firaq ki hai shaboN ka jawab sehray maiN
wisal-e-yar ka ab hai hisab sehray maiN

shabab par bhi  hai aya shabab sehray maiN
hua hai aaj husn benaqab sehray maiN

ada ka jhoom ke uTha sehab sehray maiN
nigah Khud hi bani hai hijab sehray maiN

takey huey haiN siTaroN se Khwab sehray maiN
muhabbatoN ke khile haiN gulab sehray maiN

khuli khuli si hai Dil ki kitab sehray maiN
ayaN ayaN hai wafa ka nisab sehray maiN

nigah-e-shauq liye afTab sehray maiN
heya se simta hua mahTab sehray maiN

faroGh-e-ishq, zeyay-e-jamal ka baaham
hua hai kaisa haseeN injezab sehray maiN

guzarTe umr ke lamhoN ne le ke angRai
liya hai aaj naya inqilab sehray maiN

dhaRak raha hai Dil-e-beqrar shiDDaT se
jhalak raha hai har ek iztrab sehray maiN

KhuDa kare ke har ek raaT teri aisi ho
KhaTib ki bhi Dua ka hai baab sehray maiN