winner : Meenakshi Madhur, Australia
meenakshi_madhur@yahoo.com

      * Haseen It'tefaaq *
 

   kabhee yeh it'tefaaq bhee hotaa
   maiN jis raah se guzartee
   woh bhee usee raah se guzartaa
   aur jis ghar usay hai jaanaa
   us ghar kaa pataa woh
   aakay mujhsay poochtaa
   aur jis patay pe usay hai jaanaa
   woh mere hii ghar kaa pataa hotaa.

   kabhee yeh it'tefaaq bhee hotaa
   merii woh kitaab jismeiN maiN-nay
   intezaar meiN uskay
   likh rakhii haiN nazmeN,
   pannay us kitaab ke
   meray haath se chooT jaatay.
   chooTkar  woh pannay
   hawaa meiN lagtay uRhnay
   maiN un pannoN kO pakaRnay
   unkay peechhay dauR jaatee
   unheiN pakaRatay sameTatay
   us jagaah pe pahuNch jaatee
   jahaaN woh mujhko
   khaRaa huaa miltaa.
   kabhee yeh it'tefaaq bhee hotaa..