ya ilaahi saare manzar ko suna kar de
ya mujhe dard-e-haqeeqat se begana kar de

karab se taRhapte logoN ko tasalli dede
ya wahi shaan-e-kareemi ka bahana kar de

toRh kar ghar to bana de haiN ye qabreN aakHir
bachne waaloN ke liye koi Thikana kar de

chheeN le meri basaarat ko ya uss se pahle
saare manzar ko wahi phir se purana kar de

ye tabah haali miTa de meri yaadoN se abhi
ya mera haafza le mujh ko deewana kar de

qatl insaani ko dekhoN to magar ro na sakooN
itna bas hausla de mujh ko tavana kar de

dil ke badle mere seene meN patthar rakh de
ya meri qadmoN ki Thokar meN zamana kar de

nasl insaani ke kaam aane ki himmat to ata kar
mere jazboN ko bhi qarooN ka kHazana kar de

mere sheroN meN hi marham sa asar aisa  dede
meri nazmoN ko bhi ab qaumi tarana kar de

ho nahi sakta ke Almas jo tujh se maange
kHaali haathoN se hi phir uss ko ravana kar de