Meer ki shayaree shahid hai ke Urdu kya hai
GhazleiN GHalib ki bataaeiN ke Urdu kya hai

ShikwaH Iqbal ne bhi Urdu meiN kiya
Yaa Khuda Aap bataaeiN ke Urdu kya hai

Seekhee hai Urdu zabaaN ammi se meine apnee
Meri ammi hi bataaeiN ke Urdu kya hai

Shayaree, SheereeN, Shama aur Shabnam
Yeh hi alfaaz bataaeiN ke Urdu kya hai

Huey qurbaan ka-ee naara-e-Urdu ke taley
GHazi-e-aazadi bataaeiN ke Urdu kya hai

Hind se Paak ke rishte ka hai gar naam koi
Na hai Urdu to bataaeiN ke Urdu kya hai

Apni Islam se pehchaan ka zariyaa Urdu
Is se aagey kya bataaieN ke Urdu kya hai

Aap aur Tu mein faraq kar na sake jo ab tak
Kya bhala unko bataaeiN ke Urdu kya hai

Rehte ho door-watan mulk-e-adam meiN saahab
Aao Dehli to bataaeiN ke Urdu kya hai

Ab bhi suljhaa nahi Urdu ka mu-amma, 'Dilkash'?
Jaano Urdu to bataaeiN ke Urdu kya hai

Azharul Haq Naseem

Kasim Siddiqi

Mohammad M. N. Shakeel

Sh A. Shah Khan

Yogesh Sethi