Ajaz Rashid Mughal
ajaz@urdustan.com
Bahrain
woh himala ke pehray me cchupi dunya
woh paai-e-gang-o-jaman se dhuli dunya
woh rang-e-jadeed-o-kohan se saji dunya
woh asia ke janoob me ek nirali dunya
woh jis ke chaman me khilte
hain gul hazaron
mazhab rehtay hain jahan
pe mil jul hazaron
uThtee ai kaheen se qasim ke ghoRon ki Tap
suntey hain kaheen mahmood k lashkar ki chap
khamoshi-e-fiza ko toRti hai tlwaron ki alap
aasman ko bhee garmati hai jangon ki tap
kitne hi log is zameen se
guzar gaye
kitne hain keh is watan
me Thehar gaye
har aane wala laya apni ek dastan nayee
huee phir ek tehzeeb is se ayan nayee
dunya basayee apni sab ne yahan nayee
naye rang aaye yahan aur zaban nayee
laakhon log aaye yahan hazaron
Toliyan
juda andaz sab ke aur juda
boliyan
rang-o-zaban ke farq me the sab uljhay
na jaante the ek doosray ko na samajhtay
kyoonkar phir yeh sab aakhir qareeb huway
bhula ke sab baatein yeh aik qaum banay
in kaRyon ko aik zanjeer
me joRa kis ne
taAasub ki in deewaron ko
toRa kis ne
ghairon ko aapis me kiya hamnawa urdu ne
begangee ki in ka pardah uThaya urdu ne
qiSa-e-rabt-o-izhar inhein samjhaya urdu ne
sab zabanon ko ek zaban me milaya urdu ne
ek jaadu tha woh jo yoon
sab pe ccha gaya
ya khiZar tha koyee jo a
keh rah dikha gaya
hai turki ki is ki lay me chashni
rawani-e-farsi hai is me wusAat-e-arabi
pinhan is ke saz me hai taranah-e-hindi
kitne hee sur mila ke yeh ek taal bani
koyee rang aisa bhee hai
jo is me na huwa
hai yeh woh phool koyee
khar jis me na huwa
is ka ghalib sayeban-e-ghazal ka satoon
aalim-e-nazm me iqbl ke nam se sakoon
fasana-e-hashr ho ya pitras ka maZmoon
har rang me is ke hai ek taza fasoon
khilte is chaman me hain
gul kaise kaise
naghma sara hain is me bulbul
kaise kaise
mehak is ki baghaan-e-hind se uThtee hai
SeHra-e-Arab me bhee yeh goonjtee hai
sarzameen-e-europe bhee is ko boltee hai
dunya is ko har jagah pe hee suntee hai
wusAat-e-zameen is me rifAat
aasman ki hai
saray jahan me dhoom hamari
zaban ki hai |
