NAZM  =  MAUT. 
        **************** 

  Maut ko yek saniha na kaho 
  maut se door ayese na bhago 
  maut ki asliyat ko pehchano 
  hasil-e-zeest tum isey jaano 

  Yek mehver pe ghoomti hai hayat 
   misl-e-sooraj heiN iske sab lamhat 
  yek jaisi hai donoN ki har baat 
  yek hai donoN ki savaneh hayat 

  Subh ka shams dour-e-tifli hai 
  dopeher garmi-e-jawani hai 
  asr ka waqt adheR umri hai 
  zardi-e-sham waqt-e-peeri hai 

  Aur phir raat ka samaaN hai maut 
  maah o anjum ka aasmaaN hai maut 
  jisterah din ka ikhtetam hai raat 
  zeest ka aakhri nishaaN hai maut 

  Sooraj jaise chupaye rakhta hai 
  raat ke khshnuma haseeN manzer 
  maut ke baad ke haseeN lamhey 
  aaj heiN apni sooch se baaher.