MAUT (nazm)

       maut hoon jism ki fana hoon main
       haan magar rooh ki baqa hoon main

       main hoon anfaas-e-aalamee pe muheet
       merey qabzey mein zindagee hai muqeed

       meri chahat bahaaduri ki daleel
       mujh se haibat hai buzdili ki daleel

       hai jahaan zeest hoon vahaan laazim
       rabb-e-khaliq hai yoon mera naazim

       go main talti naheen kisi se taley
       ma'soomeen ke magar hoon qadmon taley

       main na aaoon khirad ke haathon mein
       ik muamma hoon sab ke zehnon mein

       naheen "kausar" samajh na paaogee
       hikmat-e-rab samajh na paaogee