"ek maut hi to aisi haqeeqt hai dosto" 

De kar nai sharab jo sarshar kar gaye 
Adyan ke badan pe jo kal war kar gaye 
communism ka apne jo parchar kar gaye 
Allaah ke wajood ka  inkaar kar gaye 
Ayi jo maut un ke khudaoN ko kha gai 
us falsafe ki rakh talak ko mita gai 
Aise mite ke koi bhi matam kunaN na tha 
youN chup huwe ke jaise ye unka bayaN na tha 

PholoN ko tahniuN se utarna zaroor hai 
tarteeb e gulsitaN ko bikharna zaroor hai 
Is marhale se sab ko guzarna zaroor hai 
MULHID  bhi mante haiN ke MARNA  zaroor hai 

muflis pe aur bala nasheeN par bhi aaigi 
bad shakl pe bhi aur haseeN par bhi aaigi 
darya mai ya khala ya zameeN par bhi aaigi 
lamha ho maut ka to kahiN par bhi aaigi 
rahro bhi aur saheb e manzil bhi jaiga 
ghasib ko khud bhi jana hai aadil bhi jaiga 
sayyaad bhi safar mai hai bismil bhi jaiga 
maqtool ja chuka hai to qaatil bhi jaiga 

Dawa bhi maut khud hi hai khud hi wakeel hai 
har cheez ka wajood fana ki daleel hai 
ye zindagi to dhaage ki choti si reel hai 
muddat to is jahan ki khud hi qaleel hai 

DAYAM HAI DO JAHAN MAY TO TANHA WO ZAAT HAI 
WO ZAAT JIS KE "KUN" SE BANI KAYINAAT HAI