Tumnay mujh ko yuN thukraya,
sar ki dhoop meiN apna saya.

Aao tum ko ham batlaeiN,
tum ko shayad yaad nahiN hai,
kone walay uss paNdit nay,
rekhaoN ko dekh kaha tha,
paagal ho jaooNga maiN jo,
haath se tum ne haath chhuRhaya.

Tum ne mujh ko yuN thukraya…

Ham ne apna sab kuchh kho kar,
seene ke zakhmoN ko see kar,
patjhaRh ke bhi tinke chun kar,
pyar ka apne mahal banaya,
aur Lahoo se  raNg sajaya,
lekin kuchh bhi kaam na aaya.

Tum ne mujh ko yuN thukraya…

Kitne mausam beet gaye haiN,
kitne sapnay toot gaye haiN,
iss kamray ke soonepan meiN,
deewaroN se baateiN kar ke,
ham ne khud ko khoob rulaya,
tum ko kuchh bhi nazar na aaya.

Tum ne mujh ko yuN thukraya…

Kaise log badal jaate haiN,
wadoN se bhi tal jaate haiN,
jin ko apna rahbar samjha,
woh hi rah bhatak jaate haiN,
dil toe kuchh bhi samajh na paya,
laakh kaha aur laakh bataya.

Tum ne mujh ko yuN thukraya…

Ab toe koii pyaas nahiN thi,
pahle jaisi baat nahiN thi,
aur kahiN se tou mil jaati,
aisi bhi koii aas nahiN thi,
iss kar "maut" se haath milaya,
aur wafa ka farz nibhaya.

Tum ne mujh ko yuN thukraya,
sar ki dhoop meiN apna saya.