These ash'ar are by various poets sent to us by different urdustanis, And some from Steve Almas's Eid page. :-)
If you know any sher on Eid, please send them to kashif@urdustan.com 

so alfaaz kum haiN aur tammanaieN hazaaroN
mubarik hoN meri jaanib se tumhe eid ki kHushiaN

bichaRh ke mujh se kabhi tu ne yah bhi socha hai
adhhora chaand bhi kitna udaas laGta hai

raas aa jaatiN hameN bhi eid ki khushiyaN tamaam
kaash tu bhi paas hota eid ke lamHaat meN

eid ke chaaNd ki maaNind hua hai ab to
haaye woh shakhs ke har roz mila karta tha

har roz-e-eid tumhare muradoN ke
hasieN phuloN ke gHunche khila ke laaya ho
tumhari maaNg main afshaaN saje sitaaroN ki
tumhare saath kisi ba-wafa ka saya ho.... 

mujhe mil gaya bahana teri deed ka
aisi kHushi le ke aaya chaaNd eid ka 

maiN ne chaaha tujhe eid pe kuchh nazar karooN
jis meiN ehsaas ke sab raNg hoN raushan raushan
jis meiN aaNkhoN ke taraashe hu-ai moti laakhoN
jis meiN shaamil ho mere qalb ki dhaRhkan dhaRhkan 

eid ke chaaNd ko dekh ker
mere lab kap-kapaaye
per yeH duaa
is saal bhi
mere honToN se azaad na hui
ke
ai kHuda!!!
ab ke mujhe chaaNd maiN us ka chehra
dikhaai na de....

dastoor hai duniya ka magar yeH to bataao
hum kis se mileiN kis se kaheiN eid mubarik? 

Eid ka din hai gale aaj to lag ja zaalim
rasme-duniya bhi hai, mauqa bhi hai, dastoor bhi hai

chaand dekha teri aaNkhoN meiN na honToN pe shafaq
milti julti hai shab-e-gHam se teri deed ab ke
dil dukha hai, na voh pehlaa sa, na jaaN taRhpi hai
ham hi gHaafil the ke, aayee hi nahiN Eid ab ke .. 

iss meharbaan ki nazr-e-inayat ka shukria
tohfa dia hai eid pe hum ko judaai ka 

hum ne is saal bhi paayi na tere gHam se nijaat
hum ne is saal bhi na dekha eid ka chaaNd 

na jaane kyuN mere rukHsaar mahak uTh-te haiN
jab kabhi kaan maiN woH chupke se kahe "eid ka chaaNd" 

dekha halal-e-eid to tum yaad aaye
is mehwiat meiN eid hamari guzar gayi 

aayee hai Eid aaj bhi har saal ki tarhaa
par, aise ke, tarab ka koi silsilaa na ho
pichhle baras thaa khauf, tujhe kho na dooN kahiN
ab ke baras duaa hai teraa samnaa na ho 

meri jaanib se bhi mubarik ho
log kahte haiN eid aai hai 

ik lamhe ko maiN ne tujhe dekha tha
phir umar bhar meri nazar meiN na jacha eid ka chaaNd 

Eid ki sachchi khushi to dostoN ki deed hai
tum nazar se door ho, kiyaa khak apni Eid hai 

eid aayi hai masarrat ki payaami ban kar
woH masarrat jo teri deed se wabasta hai 

kia lutf-e-eid hai jo agar tum se door haiN
guzre-ga roz-e-eid tasavvur maiN aap ke 

woH subaH eid ka manzar tere tasavvur meiN
woH dil maiN aa ke ada tere muskraane ki 

Eid ke roz bhi majboor the taqdeer se ham
ro paRhe mil ke gale aap ki tasveer se ham 

kHud chaand unheeN kee deed ki chaah meiN haazir-e-kHidmat hota hai
Voh chaand ki nazroN meiN aa'aiN ,ik rashk kaa aalam hota hai
kiyaa tum ko bataaiN ham yaro kiyaa zeest ka aalam hota hai
jab uTh-te haiN un ke hinaaee hath aur adab se sar kHam hotaa hai 

wafa ka sandes le kar utre tumhaare aaNgan meiN
gawaah rafaqtoN ka, muhabbatoN ka ban kar hilaal-e-eid 

guzre hue wasal ke din raat bhool ja
milne na deiNge ab hameiN haalaat bhool ja
mausam badal gaye haiN zamana guzar gaya
ai dost tu bhi eid-e-mulaqaat bhool ja 

ahbaab puchhte haiN baRhi saadgi ke saath
tu ab ke saal eid manaye- ga kis tarah?

gHam hi gHam haiN teri ummid meiN kia rakha hai
eid aaya kare ab eid meiN kia rakha hai?

dekha hilaal-e-eid to aaya tera kHiyaal
woH aasman ka chaaNd hai, tu mera chaaNd hai

aane wali rutoN ke aaNchal maiN
koi saaet-e-sayed kia ho gi
gul na ho ga to jashn-e-kHushbu kaisa
tum na ho ge to eid kia ho gi

kHud to aae nahi aur eid chali aayi hai
eid ke roz mujhe yuN na sataye koi

eid-ul- fitr : a nazm by Nazeer Akbarabadi

by UrduCards.com

from Aleph

eid and ramadan cards : by Blue Mountain

eid cards : by Aliasoft

by IraqNet

virtual and paper cards : by eidcards.com

kuchh ash'ar eid  par : by Steve Almas 

article on Eid : by Rediff India 

and slide show
 

.