ÆBNmËeiA
ÆBNmËeiA
urdustan.com
  urdustan >> anam >> 2000  >> June

maut
  Moyen Ahsan Jazbee

you can read this nazm in Urdu script  : click here

 
  apni soyi hui duniya ko jaga looN to chalooN
apne gHam-kHaane meN ik dhoom macha looN to chalooN
aur ik jaam mai-e-talkH chaRha looN to chalooN
abhi chalta hooN zara kHud ko sambhalooN to chalooN

jaane kab pi thi abhi tak hai mai-e-gHam ka kHumaar
dhoondla dhoondla nazar aata hai jahaan-e-bedaar
aandhiyaaN chaltiN haiN duniya hui jaati hai gHubaar
aankh to mal looN zara hosh meN aa looN to chalooN

wo sehra wo aijaaz kahaaN hai lana
meri khoyi hui aawaz kahaaN hai lana
mera TooTa hua wo saaz kahaaN hai lana
ik zara geet bhi iss saaz pe ga looN to chalooN

maiN thaka haara tha itne meN jo aaye baadal
kissi matwaale ne chupke se barha di botal
uff wo rangeen pur-israar kHyaaloN ke mahal
aise do chaar mahal aur bana looN to chalooN

mujh se kuchh kahne ko aayi hai mere dil  ki jalan
kya kiya maine zamaane meN nahi jiss ka chalan
aansooN tum ne to bekaar bhigoya daaman
apne bheege hue daaman ko sukha looN to chalooN

meri aankhoN meN abhi tak hai muhabbat ka gHuroor
mere honToN ko abhi tak hai sadaaqat ka gHuroor
mere maathe pe abhi tak hai sharaafat  ka gHuroor
aise wahmoN se bhi ab kHud ko nikaalooN to chalooN

 

questions or comments about this nazm : kashif@urdustan.com