sharaab-o-sher ki taaseer hai ThanDi hawaaoN  meN
bahaar-e-zindagi gHaltaaN hai sabze ki adaaoN meN
nawaa-e-sarmadi raqsaaN hai jharnoN ki sadaaoN meN
bayaaN mumkin nahiN wo lutf aata ahi duaaoN meN 
yahaaN sadiyoN se raayej parsakooN sheereeN muqaali hai
yahaaN ka zarra zarra mazhar-e-shaan-e-jalaali hai

tajalli zaar-e-irfaaN , shaahkaar-e-ibn aadam hai
sar fitrat, aml ki baargaah-e-husn meN kHam hai
tamaddun man'aks ho jis meN aisa sagHar-e-jam hai
jamaa-e-zindagi raheen-e-jalaal-e-azam gautam hai
umeed-e-jaan-e-taaza phir dil-e-bismil meN aayi hai
talaash-e-aman meN tahzeeb is manzil meN aayi hai

kahiN paida hai saari kaifiyat sahan-e-gulistan ki
kahiN raunaq nazar aati hai bazaar-o-shabistaN ki
kahiN hairat , zabaan haal hai, haal-e-pareshaaN ki
lakeereN haiN ke sharyaaneN dil-e-insaan-o-haiwaaN ki
kahiN zulmat ke peechhe raushani mahsoos hoti hai
kahiN kHud maut meN bhi zindagi mahsoos hoti hai

hareef-e-nagHma jaaN-bakHsh ye kHaamosh goyaaee
kamaal-e-fikr-o-fan, husn-e-tanaasub, shaan-e-zebaaee
haqeeqat ban gayi jazbaat ki sad rang ra'anaee
laboN par safu-gan hai noor aijaaz-e-maseehaee
nigaahoN meN ajab andaaz hai kHara-gudaazi ka
diloN par naqsh rah jata hai jin ki be niyaazi ka

karishma hai ye arbaab-e-hamam ki sayi paiham ka
jinheN ahsaas bhi hota na tha kuchh shaadi-o-gHam ka
diloN par aks kheench aaya tha jin ke husn-e-aalam ka
qalam ko naqsh azbar ho gaya tha asm-e-aazam ka
chaTTaanoN par shabaab-o-husn ki maujeN rawaaN kar deN
fasooN kaaroN ne rangoN meN mutaqeed bijliyaaN kar deN

hareem-e-ka'ba-e-fan, ma'abad-e-nazuk kHayalaaN hai
jahaan-e-noor-o-nik-hat, miskeen-e-aashufta halaaN hai
janooN afshaaN faza meN masti-e-chashm-e-gHazaalaaN hai
lab joo-e-kahastaaN jalwaa-gaah-e-kHush jamalaaN hai
mila hai zindagi ko baankpan inn kuj kalaahoN se
nazar waaloN pe shamsheereN barasti haiN nigaahoN se

jigar ke kHoon se kheenche gaye haiN naqsh lasaani
tasadduq jin ke har kHat par tahayyur kHana-e-maani 
mushkil hai shabaab-o-husn meN takHayyul-e-insaani
taqaddus ke sahaare ji raha hai zauq-e-uryaani
haseenaan-e-ajanta ka jahoN sartaaj hai goya
yahaaN jazbaat ke maraaki meraaj hai goya

hunar mandoN ne tasveeroN meN goya jaan bhar di hai
taraazo dil meN ho jaati hai wo kaafir nazar di hai
adaaoN se ayaaN hai lazzat-e-dard-e-jigar di hai
khileNge raaz is Dar se dahan par muhar kar di hai
ye tasveereN bazaahir saakat-o-kHaamosh rahti haiN
magar ahal-e-nazar poochheN to dil ki baat kahti haiN

gulistaaN se jo guzara qaafila fasal-e-bahaari ka
bahana mil gaya ahl-e-junooN ko husn kaari ka
chaTTanoN par banaya naqsh dil ki beqaraari ka 
sikhaya gur usse jazbaat ki aayina daari ka
amanat seena-e-kuhsaar meN ik daastaaN rakh di
jigar daaroN ne buniyaad-e-jahaan-e-javedaaN rakh di

jahaaN chhoRha kHushi se javdaaN paigHam ki kHaatir
saf aara the shikast-e-gardish-e-ayaam ki kHaatir
jhukaya sar na apna shohrat-o-ina'am ki kHaatir
jiye bhi kaam ki kHaatir mare bhi kaam ki kHaatir
zamaane ki jabeeN par aks chhoRhe haiN nigaahoN ke
raheNge naqsh in ke, naam miT jaayeNge shaahoN ke