Saraapa

raat ka paich-o-kHam teri zulfeN
chandani ka nikhaar, tera badan

subah ki naram law  jabeeN teri
pighla pighla sa aaNch per kundan
[ jabeeN= forehead]

hoNT tere shafaq ka maikHana
aaNkh teri, bahaar ka maskan
[ hoNT= lips; shafaq= dawn; maskan= dwelling]

ik lachakta hilaal, ya abroo
ik lapakti shuaa' , ya chitwan
[ hilaal= moon of Eid; shuaa' = rays; chitwan= sight]

teri mizhgaaN ki jumbish-e-paiham
sinaa-e-kaaynat ki dhaRhkan
[ mizhgaaN = eyelashes; jumbish= movement;
paiham= continuous; kaaynat= creation/ universe]

nikhat-e-shaam-o-Itar baad-e-saba
kya hai ? juz tera faiz-e-pairaahan
[ nikhat= fragrance, baad-e-saba= morning breeze;
faiz= kindness/bounty; pairaahan= clothing ]

jumbish-e-mahar-o-maah, tera kHiraam
gardish-e-roz-o-shab, tera daaman
[ mahar= sun ( here); maah= moon; kHiraam= walk;
gardish= revolving/movement; shab= night]

tujh se bedaar qalb-e-aab-o-gil
tujh se sarshaar, rooh-e-sarw-e-saman
[ bedaar= aware; qalb= heart; aab= water, gil= earth
sarshaar= intoxicated; rooh= soul;
sarw= cypress tree; saman= jasmine]

teri lai nazm-e-saabit-o-sayyaar
tera nagHma kashish ka raaz-e-kuhan
[ kashish= attraction; kuhan= old]

shama-e-konain hai ke tera nafas
husn-e-taqdeer hai ke tera sukHan
[ shama-e-konain= candle of both the worlds,
nafas= breath; sukHan= talk]

har talattuf meN, har tagHaaful meN
tu junooN dost, aagahi dushman
[ talattuf = kindness; tagHaaful = to ignore;
aagahi= knowledge]

zindagi hai ke tera aaina
tu hai ya kaynaat ka joban
[ aaina= mirror; joban= youth]

kashif@urdustan.com