U R D U S T A N : jo 2000 saal aur bhi jiye hote : nazm by Khursheed ul Islam

urdustan.com urdustan.com
urdustan > anam > 1999 > December

jo do hazaar baras aur bhi jiye hote

by Khursheed ul Islam

Read this nazm in original Urdu script.

jo do hazaar baras aur bhi jiye hote
to kya kHuda ki kHudaayi meN farq aa jaata
hamaare hone se kis cheez meN kHalal parhta
kHuda ki shaan meN, bandoN ke aab-o-daane meN
falak ke nazm, anaasir ke taane baane meN
hawa ki simtoN ke paani ke kaarkHaane meN
zameen ki garmi ke yaaqoot ke khazaane meN
hamaare hone se kis cheez meN kHalal parhta

hawas nahi hame jeene ki besabab besood
na ham nijaat ke talab na ham ko shauq-e-nimrood
na ye kHyaal ke ho jaayeN abad se ma'bood
hamaare dil meN bharhakta hai aik shola sa
wo shola kHwaab bhi hai aarzoo bhi, hasrat bhi
wo shola Dasta bhi hai aur dua bhi deta hai
wo shola kahta hai jeete raho, jiyo , ji lo
ke maut aati hai, aayegi, Tal nahi sakti

magar jo jeete rahe tum to aik di aisa
zaroor aayega, aakar rahega, dekhoge
ke faasla na zameeN ke na aasmaaN ke rahe
ke marhale man-o-too ke , na een-o-aaN ke rahe
ke farq harf-o-sada ke na kuchh bayaaN ke rahe
ke husn na kaabe meN hai aur na somnat meN hai
jo husn hai wo faqat aadmi ki zaat meN hai

|| urdustan ||
adeeb | anam | e-mail | messageboard | mushaira | u-hoo | about us
e-mail : kashif@urdustan.com