anam I bazm I kHazana I kashif
    Mera Safar
    by Ali Sardar Jafri
    read this nazm in Urdu without downloading any font
    read this nazm in Umair 1Urdu font
        Sardar Jaafri  was born in Balrampur (UP) in 1913. Jafri was one of the founders of the Progressive Writers Movement and edited PWA's literary magazine naya adab . He also edited guftagu  and Indian Literature. He has been awarded Padma Shri, Iqbal Samman, Soviet Land Nehru Award, Mir Award, Pakistan's Iqbal Medal and most recently India's Jnanpith Award.
    hum cho sabzaH baar-ha ruyeedaH eim  ---- Roomi

    phir aik din aisa aayega
    aaNkho key diye bujh jaayeNgey  [ diye= lamps]
    haathoN key kaNwal kumhlaayeNge [ kaNwal= lotus, kumhlana= to wilt]
    aur barg-e-zabaaN sey nataq-wa-sadaa [barg-e-zabaaN= tip of tongue]
    ki har titlee uRh jaayegi [ titlee= butterfly]
    ik kaaley samandar ki tah meiN
    kaliyoN ki tarah sey khilti hui
    phooloN ki tarah sey haNsti hui
    saari shakleiN kho jaayeNgi
    kHooN ki gardish, dil ki dhaRhkan
    sab raaginyaaN so jaayeNgi
    aur neeli fazaa ki makHmal par
    haNsti hui heerey ki yeH kani
    yeH meri jannat, meri zameiN
    iss ki subhaiN, iss ki shaameiN
    bey jaaney huey, bey samjhey huey
    ik musht gHubaar-e-insaaN par
    shabnam ki tarah ro jaayeNgi
    har cheez bhula di jaayegi
    yaadoN key haseeN but kHaaney sey
    har cheez uTha di jaayegi
    phir koi nahiN yeH puchhega
    SARDAR kahaaN hai mahfil meiN
    lekin meiN yahaaN phir aaooNga
    bachchoN key dahan sey bolooNga  [ dahan= mouth]
    chiRhyoN ki zabaaN sey gaaoNga
    jab beej haNseiNgey dharti meiN
    aur konpleiN apni ungli sey [ konple= foliage]
    miTTi ki tahoN ko chheRheiNgi
    meiN patti patti, kali kali
    apni aaNkheiN phir kholooNga
    sar sabz hatheli par ley kar
    shabnam key qatrey tolooNga
    meiN raNg-e-hena, aahaNg-e-gHazal
    andaaz-e-sukHan ban jaaooNga
    rukHsaar-e-aroos-e-nau ki tarah
    har aaNchal sey chhan jaaoNga
    jaaRhoN ki hawaaeiN daaman meiN
    jab fasal-e-kHazaaN ko laayeNgi
    rahroo key jawaaN qadmoN key taley
    sookhey huey pattoN sey merey
    hansney ki sadaayeiN aayeNgi
    dharti ki sunhari sab nadiyaaN
    aakash ki neeli sab jheeleiN
    hasti sey meri bhar jaayeNgi
    aur saraa zamaanaH dekhegaa
    har qissaH mera afsaanaH hai
    har aashiq hai sardaar yahaaN
    har maashooqaH sultanaaH hai
    maiN aik gurezaaN lamha hooN
    ayyam key afsooN kHaaney meiN
    maiN aik taRhapta qatraH hooN
    masroof-e-safar jo rahta hai
    maazi ki suraahi key dil sey
    mustaqbil key paimaney meiN
    maiN sotaa hooN aur jaagta hooN
    aur jaag key phir so jaata hooN
    sadyioN ka puranaa khel hooN maiN
    maiN mar key amar ho jaata hooN
     


    Links on Sardar Jafri

    Sardar Jafri awarded Jnanpith Award

    Sardar Jafri awarded Janapith Award: by Rediff India

    by Nita

     movie songs written by Sardar Jafri

     

    anam I bazm I kHazana I kashif