جون ایلیا

یہ  1994 کی بات ہے جب ہمارے شہر دوحہ میں جشنِ محشر ہوا، 
  شعرا کے تعارف پر ایک مجلہ چھپا،  مجلے کی ورق گردانی کرتے ہوئے ایک شاعر کی تصویر پر نظر رکی،
  تصویر دیکھ  کر ایک نا قابلِ بیان کیفیت پیدا ہوئی،   تصویر کے نیچے لکھا تھا، 
  ٬٬میرا نام جون ایلیا ہے، میرے دادا کے دادا میر تقی میر کے شاگرد کے شاگرد تھے۔٬٬ 
 اس جملے نے مجھے بہت متاثر کیا،  اشعار پڑھے ،
 اور اس وقت کی  علمی قابلیت کی بنا پر انہیں سمجھ نہ سکا،  اور  صفحہ پلٹ دیا۔  

کئی دن بعد جب میں اپنے دوستوں کے ساتھ بیٹھا  غالب ، اقبال اور جوش کے اشعار سے
 ان کی سماعتوں پر تابڑ توڑ حملے کر رہا تھا،
 تو میرے ایک بے تکلف دوست نے اپنے روایتی انداز میں کہا : 
 ٬٬ امجد یہ شعر سن،  ارشاد،  
 

خامشی کہ رہی ہے کان میں کیا،

        آ رہا ہے مرے گمان میں کیا
   یہ مجھے چین کیوں نہیں پڑتا
 ایک ہی شخص تھا ، جہان میں کیا

میں نے کہا،٬٬ شعر بہت اچھے ہیں ، کس کے ہیں بھائی٬٬ 
،   کہنے لگا،   ٬٬جون ایلیا کے ہیں٬٬،   جون ایلیا ں نام سنا ہے،
یوں جون صاحب کی شاعری سے باقاعدہ تعارف ہوا، 
 کچھ عرصے بعد اپنے اردو کے استاد سے جون صاحب کا پہلا  شعری مجموعہ ٬٬شاید٬٬ بھی مل گیا،
 پھر کیا،  آئے دن دوستوں سے جون ایلیا صاحب کی باتیں ہونے لگیں۔ 
 میرے ایک دوست جو جون صاحب کو زاتی طور پر جانتے تھے اکثر جون صاحب کا غیر مطبوعہ کلام سنایا کرتے تھے۔ 
 اور یہ سلسلہ آج بھی قائم ہے۔   ایک واقعہ یوں سناتے ہیں۔ 

٬٬ ایک مرتبہ  میں اپنے والد صاحب کے ہمراہ ایک محفل میں بیٹھا تھا، 
 اس محفل میں بڑی علمی اور ادبی گفتگو ہو رہی تھی، 
 جب وہ باتیں نستعلیق گوئی کا لبادہ اوڑھ کر میرے سر پر سے گزرنے لگیں
 تو میں  سامنے میز پر رکھا اخبار  ٬٬شام٬٬   پڑھنے لگا۔ 
  اتنے میں آواز آئی  ٬٬کون ہے یہ  نا معقول٬٬،  میں نے فور،
 ٬٬یہ اپنا برخوردار ہے٬٬،  جون صاحب کہنے لگے پھر بھی بہت نا معقول ہے،
  اس کے سامنے جون ایلیا اردو بیٹھا ہوا ہے، اور یہ کمبخت شامیوں کا اخبار پڑھ رہا ہے

اب کچھ باتیں جون صاحب سے متعلق بھی ہو جائیں، 
 جون ایلیا ایک علمی اور ادبی گھرانے میں آنکھ کھولنے والے ایک یکتائے روزگار  شاعر تھے۔  
 1931 میں  ہندوستان کے شہر امروہہ میں پیدا ہوئے۔  والد کا نام سید شفیق حسن ایلیا تھا، 
 دادا  سید نصیر حسن اور دادا کے دادا سید امیر حسن امیر بھی شاعر تھے۔  
  والدہ کا نام سیدہ نرجس خاتون تھا۔   جون کی ایک بہن اور تین بھائی تھے۔  
 تینوں بھائی بھی شعر و ادب سے گہرا تعلق رکھتے تھے،   رئیس امروہوی، سید محمد تقی اور سید محمد عباس۔

شاعری کے آغاز کے بارے میں جون صاحب فرماتے ہیں، 
کہ پہلا مصرع اپنے ہم عمر بچوں کے ساتھ کھیلتے ہوئے یہ کہا
٬٬ کربلا جانے سے ہو جائے گی شام٬٬

جہاں تک پہلے شعر کا تعلق ہے تو آٹھ برس کی عمر میں جب پہلا عشق ہوا تھا، اس وقت کہا تھا۔

  وہ شعر بھی سن لیجیے، وہ شعر پری بیگم کے لئے کہا گیا تھا۔
 
٬٬چاہ میں اس کی طمانچے کھائے ہیں
   دیکھ لو سرخی مرے رخسار کی٬٬
یہ تو تھا پہلا عشق،  دوسرا عشق  اس سے کیا جسے اپنی تمام شاعری کا محور کہتے تھے۔ 

 اس کا نام ہے ٬٬فارہہ٬٬۔   فارہہ سے جون کی منگنی بھی ہو گئی تھی مگر شادی نہ ہو سکی۔
 

فارہہ کے گھر ایک دن ان سے ملنے گئے،
  دیدار کی طلب نے جون کو بے قرار کر رکھا تھا،
  فارہہ اپنے کمرے میں غالباً محوِ استراحت تھیں،
 جون کی آمد کی خبر سے نا آشنا رہیں، دوسری جانب جون بسیار ِ
 انتظار کے بعد کبیدہ خاطر گھر لوٹے اور کہنے لگے:

ہے مجھ پر طعنہ زن خود میرا احساس
تمنا اپنی قیمت کھو رہی ہے
کہوں کیا ہر پلک اس بے خبر کی
مری آنکھوں میں کانٹے بو رہی ہے
خوشا یہ طرزِ تعظیمِ محبت 
یہ تعظیمِ محبت ہورہی ہے
غمِ فرقت کا شکوہ کرنے والی
میری موجودگی میں سو رہی ہے

جب فارہہ سے رشتہ ٹوٹ گیا تو جون صاحب نے فارہہ کا غم غلط کرنے کے لئے 
ایک فرضی محبوبہ کا پیکر تراشہ  وہ تھی  ٬٬ فروزینہ٬٬۔  
ایک جگہ کہتے ہیں۔

اے فروزینہ تمہاری بارگاہِ ناز میں
فارہہ کے غم بھلانے کے لئے آیا ہوں

پھر جون صاحب پاکستان تشریف لے آئے،  
 روزگار کا مسئلہ تو تھا ہی،   اور  شاعرانہ مزاج مکتبِ روزگار میں شغلِ
 اوراق اورمسئلوں میں سر کھپانے کی اجازت نہیں دیتے تھے،
 اس لئے ٬٬انشائ٬٬  کا اجرائ کیا،  اور کچھ ہی عرصے میں 
 ٬٬انشائ٬٬  ایک بین الاقوامی جریدے کی حیثیت اختیار کر گیا۔  

یہاں سے شروع  ہوتی ہے تیسرے عشق کی کہانی ۔ 
 ایک روز بڑے بھائی نے ایک مضمون دیا اور کہا کہ اسے ٬٬انشائ٬٬ میں چھاپ دو۔ 
 جون کو اس مضمون کی نستعلیق گوئی اور  اسلوب نگاری بے حد پسند آئی۔ 
  مضمون نگار کا نام ،  زاہدہ بانو تھا۔   ٬٬انشائ٬٬ کے طفیل قربتیں بڑھیں اور شادی ہو گئی، 
 اور وقت گزرتا گیا،  زاہدہ سے جون کے تین بچے ہوئے،  ایک بیٹا اور دو بیٹیاں۔  

جون صاحب کا پہلا شعری مجموعہ  ٬٬شاید٬٬  60  برس کی عمر میں شائع ہوا تھا، 
 اور دوسرا  مجموعہ  ٬٬یعنی٬٬ ان کی وفات کے بعد شائع ہوا۔

 

 جون کے بارے میں ہم یہ کہ سکتے ہیں کہ انہوں نے لکھا بہت کچھ، مگر  چھپوایا بہت کم، 
 اس  کی وجہ یہ بتائے تھے کہ والد مرحوم سے وعدہ کیا تھا کہ ان کی کتب چھپوائوں گا،
  والد سے کیا گیا وعدہ نبھا نہ سکے اور اس کی پاداش میں اپنی کتب چھپوانے سے ہمیشہ عاری رہے۔ 

 شاعری کے علاوہ  تاریخ،  علم الاعداد،  جیومٹری اور ریاضیات میں کمال فن رکھتے تھے۔  

 منظوم  تاریخ اسلام  حضرت آدم سے شروع کی اور سینکڑوں بند لکھ ڈالے،
  میرے دوست کے والد صاحب فرماتے ہیں،
 کہ  جب جون سے چند سال قبل ملاقات ہوئی تھی  اس وقت ان کی منظوم تاریخ  واقعہ کربلا تک پہنچ چکی تھی۔ 
   خدا جانے وہ سب مسودات محفوظ ہاتھوں میں  ہیں یا نہیں۔ 

 ان کی کتاب  یعنی کے دیباچے میں ان کے بھیتیجے شکیل عادل زادہ صاحب لکھتے ہیں کہ
 جون کے پاس ان کی کتاب ٬٬ شاید٬٬ جتنے چودہ  مسودے تیار تھے، 
  اور انہوں نے وفات سے کچھ عرصہ قبل یہ مسودات  ایک نوجوان کے ہاتھ مجھے سپرد کرنے کے لئے بھیجے، 
 مگر اس دوران  جون صاحب  انتقال فرما گئے، 
 اور وہ نو جوان  ان پر اپنا حق جتاتے ہوئے مجھے وہ مسودات دینے سے انکاری ہو گیا۔ 

جون صاحب پر کہنے کو تو بہت کچھ ہے،  ان کی شاعری ،  ان کے افکار،  دیگر شعرائ کی  جون ایلیا پر  آرائ، 
 مگر اس کے لئے  وقت اور  مزید مطالعہ درکا ر ہے،  انشآاللہ  میں اور میرے دوست  اس پر مزید کام کریں گے۔